Diputa gid. Ari na. Masugod na kita sulat natuhoy sa mga nasari-sari nga mga bagay, ihitabo kag bisan ano nalang nga makita naton ukon ma-experience sa aton kinabuhi. Kay sa subong nga punto sang akon kabuhi, daw tanan nalang buyayawon mo.
Ti, 2024 na, subong ka palang ya masugod blog? Daw Youtube, Tiktok ukon Reels na ang uso.
Nami man tani magvlog-vlog ugaling damo lang rason ngaa nga blog lang anay kita.
-
Una nga rason - indi ko kabalo mag-edit video. Daw asta lang gid record ang nabal-an ko. Ang level sang creativity ko mas malapit sa zero sang sa below average.
-
Ika-duh - nahuya pa ko magpakita akon tsura kay wala ko lahi nga artistahon. Mabudlay kun laway ka. Kinlanlan sagad-sagad ka gid sa ginahimo mo ukon masadya ka lantawon - mga bagay nga wala sa akon.
-
Ikatlo - medyo ginahingayo ko pa ang gamay nalang nga privacy nga nabilin sa kabuhi ko. Syempre gusto ko man magsulat sang mga opinion ko nga wala ko kabalaka nga mag-lain ang panulok kag pagtrato sa akon sang akon mga kilala.
Pero ang matuod-tuod gid ya nga rason ngaa gin-umpisahan ko ni kay sang naga-pangita ko domain name para sa isa ka project, disgrasya ko lang na gin-type ang diputa. Sang nakita ko nga available, daw wala na ko kapanumdum maayo kag ginbakal ko ini. Sang dasun nga adlaw naging dilemma ko na ini kun anohon ko. Daw mabudlay ubrahan concept kay may indi manami nga meaning. Gani ari kita subong. Ubrahan nalang blog. Diputa gid, indi bala?