Diputa. Nagtimpla lang ko kape, wala na dayun internet? Hambal ko gid mo. Basta gani may magsaka sa poste diri sa subdivision, ang kasunod niya sina, utod ang linya sang amon internet. Daw ikapila nagid ya nga nagakatabo. Indi mang gid 100% pero daw ara sa 80% of the time, nagakatabo. Mayo lang tani kun pagtawag mo sa hotline sa internet provider mo, ara sila dayon pro kun kisa semana ang isipon mo bag-o mo sila makita.
Baw kun barato lang tani ang Starlink para may inugbaylo kita para sa hinatabo parehas sini. `Teh, may data man silpon mo". Huo, man gani, pro indi sa tanan nga oras nami signal sa sulod balay. Kag lain gid ya. Ang silpon ga init. Pila lang ya pwede maka-connect kag maka gamit dungan. Kag laban sa aton indi unli ang data. Limitado ang hulag naton kun sa data sang sim card lang kita masalig. Tilawi niyo bala tether ang laptop niyo sa silpon kag mag lantaw Netflix nga naka fullscreen kun ano kalawig lang tinir sang inyo nga 30Gb nga data.
Sa panahon subong ang internet daw naging basic necessity na ya. Madamo na sa aton naga salig sa internet para sa aton pangabuhian. Madamo sa aton nga sa internet lang makalingaw-lingaw. Mas barato pa maglingaw-lingaw sa internet kun ikumpara kun kis-a sa paglagaw sa kun diin. Madamo sa aton sa internet lang nagakilitanay sa aton isig kapamilya kag sa mga tawo nga malapit sa aton. Diputa, iban gani sa internet lang maka eksperyensiya nobyo ukon nobya.
Amo na gani nga kun wala internet, daw maguba gid ang aton kalibutan. Gasaka gid aton dugo. Gainit aton ulo. Nagaluya aton lawas. Daw mapatay gid kita... kay, diputa maulihi na kita sa tsismis.